జీహెచ్‌ఎంసీ ఉదయపు ఆకస్మిక తనిఖీలు ముమ్మరం

హైదరాబాద్ సాక్షర: నగర పరిశుభ్రత, పౌర సదుపాయాల పరిరక్షణపై మరింత కట్టుదిట్టమైన పర్యవేక్షణ చేపట్టిన గ్రేటర్ హైదరాబాద్ మున్సిపల్ సంస్థ అధికారులు ఉదయపు ఆకస్మిక తనిఖీలను కొనసాగించారు. నగరంలోని ఖైరతాబాద్, సికింద్రాబాద్, రాజేంద్రనగర్ ప్రాంతాల్లో పారిశుధ్య నిర్వహణ, చెత్త సేకరణ, కొనసాగుతున్న అభివృద్ధి పనుల పురోగతిని ప్రత్యక్షంగా పరిశీలించారు. మెమన్ కాలనీ, శివరాంపల్లి, మహస్తాన్ నగర్, సీబీఐ కాలనీ ప్రాంతాల్లో వీధుల శుభ్రపరిచే కార్యక్రమాలు, చెత్త ఎత్తివేత, కాలువల మట్టి తొలగింపు, రహదారుల పరిస్థితి, ప్రజా ప్రదేశాల సంరక్షణ వంటి అంశాలను అధికారులు సమగ్రంగా పరిశీలించారు. పారిశుధ్య సిబ్బంది హాజరు నమోదు పుస్తకాలను కూడా పరిశీలించారు. పనుల్లో ఎలాంటి నిర్లక్ష్యం చోటుచేసుకోకుండా విభాగాల మధ్య సమన్వయం బలోపేతం చేయాలని సూచించారు. ప్రతి ప్రాంతంలో సమయానికి చెత్త తొలగింపు జరిగేలా చర్యలు తీసుకోవాలని ఆదేశించారు. నగర పరిశుభ్రత పరిరక్షణలో ప్రజల భాగస్వామ్యం కీలకమని అధికారులు పేర్కొన్నారు. చెత్తను వేరు చేసి ఇవ్వడం, ప్రజా ఆస్తులను కాపాడడం, నగరాభివృద్ధి కార్యక్రమాలకు సహకరించడం ద్వారా శుభ్రమైన హైదరాబాద్ నిర్మాణంలో ప్రతి పౌరుడు భాగస్వామి కావాలని విజ్ఞప్తి చేశారు.