జీతం ఇవ్వని యజమాని.. దుకాణానికి నిప్పెట్టిన ఉద్యోగి.. రూ.24కోట్ల నష్టం

ఈ ఘటనలో సూరత్‌లోని శ్యామ్ సంగిని టెక్స్‌టైల్ మార్కెట్‌లో 14 దుకాణాలు పూర్తిగా కాలిపోగా, సుమారు 24 కోట్ల రూపాయల విలువైన వస్త్రాలు దగ్ధమయ్యాయి. రోజుల తరబడి విచారణ జరిపిన అనంతరం, సరోలి ప్రాంతంలో సెప్టెంబర్ 9న జరిగిన ఈ అగ్నిప్రమాదం యాదృచ్ఛికం కాదని, ఉద్యోగి తన యజమానిపై పథకం ప్రకారం చేసిన దుశ్చర్య అని పోలీసులు తెలిపారు. ఈ అగ్నిప్రమాదానికి సంబంధించి సూరత్ క్రైమ్ బ్రాంచ్ పోలీసులు 33 ఏళ్ల వినోద్ పండిట్ సావలేను అరెస్టు చేశారు. ఆ మార్కెట్ భవనంలోని ఆరవ అంతస్తులో ఉన్న ఒక దుకాణంలో సావలే అకౌంటెంట్‌గా పనిచేశాడని, తనకు రావాల్సిన సుమారు రూ. 10,000 చెల్లింపు విషయంలో యజమానిపై ఆగ్రహంతో ఉన్నాడని పోలీసులు తెలిపారు.ఈ క్రమంలో సావలే ఏప్రిల్ 2026లో సుమారు రూ. 30,000 జీతంతో ఆ దుకాణంలో చేరాడు. ఆ తర్వాత పని విషయంలో యజమానితో వివాదం తలెత్తడంతో అతను ఉద్యోగం మానేశాడు. తనకు చెల్లించాల్సిన డబ్బు విషయంలో ఏర్పడిన వివాదం అతనిలో ఆగ్రహాన్ని కలిగించిందని, దాంతోనే అతను దుకాణానికి నిప్పు పెట్టాలని పథకం రచించాడని పోలీసులు పేర్కొన్నారు. ఇది అతని మొదటి ప్రయత్నం కాదని దర్యాప్తు అధికారులు వెల్లడించారు. సావలే గతంలో కూడా ఆ దుకాణానికి నిప్పు పెట్టడానికి ప్రయత్నించాడని, అయితే ఆ ప్రయత్నం విఫలమైందని వారు తెలిపారు. ఆ తర్వాత అతను మరో ప్రణాళికతో వచ్చాడని, ఈసారి అగ్ని ప్రమాదానికి పెట్రోల్‌ను ఉపయోగించాడని పోలీసులు చెప్పారు.ఇవ్వాల్సిన జీతంలో పదివేల రూపాయల బకాయి పడిన యజమానికి కోట్లాది రూపాయల్లో నష్టం వాటిల్లింది. పదివేల రూపాయల జీతం ఇవ్వలేదనే కోపంతో ఓ అకౌంటెంట్ యజమానిపై పగ తీర్చుకున్నాడు. రూ. 10వేల విషయంలో అసహనం, అసంతృప్తితో సూరత్‌లోని తన యజమాని దుకాణానికి ఉద్యోగి నిప్పు పెట్టాడు. దీనివల్ల రూ. 24 కోట్ల నష్టం వాటిల్లింది. దీంతో ఆ ఓనర్ తలపట్టుకోవాల్సి వచ్చింది.