భారత్–స్వీడన్ సహకారానికి కొత్త ఊపునిచ్చిన భేటీ

న్యూఢిల్లీ సాక్షర: స్వీడన్ ఉప ప్రధానమంత్రి ఎబ్బా బుష్ తో కేంద్ర మంత్రి పీయూష్ గోయల్ సార్థక భేటీ నిర్వహించారు. ఈ సందర్భంగా ఇరుదేశాల మధ్య ద్వైపాక్షిక సంబంధాల బలోపేతం, ఆర్థిక భాగస్వామ్యం విస్తరణపై సమగ్ర చర్చ జరిగింది. ప్రపంచ పెట్టుబడుల గమ్యస్థానంగా భారత్ ఎదుగుతున్న విధానాన్ని మంత్రి వివరించారు. విస్తృత వినియోగదారుల మార్కెట్‌, పెట్టుబడులకు అనుకూల వాతావరణం, ప్రత్యక్ష విదేశీ పెట్టుబడులకు సౌకర్యవంతమైన విధానాలు భారత్‌ను అంతర్జాతీయ పెట్టుబడిదారులకు ఆకర్షణీయ కేంద్రంగా నిలబెట్టాయని పేర్కొన్నారు. హరిత సాంకేతికత, పరిశోధన మరియు అభివృద్ధి రంగాల్లో పరస్పర సహకారాన్ని మరింతగా బలోపేతం చేయాలనే సంకల్పాన్ని ఇరువురు నాయకులు పునరుద్ఘాటించారు. పునరుత్పాదక శక్తి, పరిశ్రమల ఆధునికీకరణ, పర్యావరణ పరిరక్షణ, సాంకేతిక ఆవిష్కరణల ప్రోత్సాహం వంటి అంశాల్లో భాగస్వామ్యాన్ని విస్తరించేందుకు సిద్ధంగా ఉన్నట్లు వెల్లడించారు. సుస్థిర అభివృద్ధి లక్ష్యాల సాధనలో కలిసి పనిచేయాలని నిర్ణయించారు. భారత్–యూరోపియన్ యూనియన్ స్వేచ్ఛా వాణిజ్య ఒప్పందం కింద సహకారాన్ని మరింత ముందుకు తీసుకెళ్లే దిశగా చర్చలు జరిగాయి. ఈ ఒప్పందం ద్వారా వాణిజ్య అవకాశాలు పెరగడంతో పాటు తయారీ, సమాచార సాంకేతికత, వ్యవసాయం, ఔషధ రంగాల్లో పెట్టుబడులు విస్తరించే అవకాశం ఉందని అభిప్రాయపడ్డారు. భారత్‌లోని నైపుణ్యంతో కూడిన యువశక్తి, స్వీడన్‌లోని ఆవిష్కరణ శక్తి కలిసి పనిచేస్తే సుస్థిర అభివృద్ధికి కొత్త దిశ ఏర్పడుతుందని మంత్రి పీయూష్ గోయల్ విశ్వాసం వ్యక్తం చేశారు. ఇరుదేశాల మధ్య ఉన్న స్నేహబంధం భవిష్యత్తులో మరింత బలపడుతుందని ఆయన పేర్కొన్నారు.